Samfélagsleg ábyrgð
Áhersla á sjálfbærni
Samfélagsábyrgð PwC er mikil og byggir að miklu leyti á sérfræðiábyrgð endurskoðenda og annarra sérfræðinga. PwC sinnir mikilvægu hlutverki í samfélaginu með því að staðfesta áreiðanleika fjárhagsupplýsinga og skapa þannig traust í viðskiptum. PwC hefur lagt áherslu á að leggja sitt af mörkum til faglegrar uppbyggingar á starfssviði fyrirtækisins, í menntakerfinu með því að skapa svigrúm hjá starfsmönnum okkar til kennslu og í viðskiptaumhverfinu með því að þjálfa fjölda hæfra sérfræðinga. PwC ber jafnframt víðtæka ábyrgð sem þátttakandi í samfélaginu.
Við höfum skuldbundið PwC á heimsvísu að ná kolefnishlutleysi sem við köllum Net Zero og höfum sett okkur vísindamiðuð markmið til skemmri tíma; 50% samdrátt fyrir 2030. Samfélagsráð PwC sér til þess að stöðugum árangri sé náð í sjálfbærnimálum.
Sjálfbærniskýrsla Pricewaterhousecoopers ehf. (PwC) hefur nú verið tekin saman í sjötta sinn og kynnir megináherslur félagsins og frammistöðu á sviði samfélagsábyrgðar.
Skýrslan endurspeglar áherslur félagsins á sviði umhverfismála, ábyrgra stjórnarhátta, mannauðsmála og samfélagslegrar þátttöku á rekstrarárinu FY25 sem nær frá 1. júlí 2024 til 30. júní 2025.
PwC setur sér árleg markmið á sviði sjálfbærni- og samfélagsmála. Fyrir árið voru sett 22 markmið, í takt við helstu viðfangsefni félagsins á sviði samfélagsábyrgðar. Markmiðin og árangur þeirra á rekstrarárinu er að finna í skýrslunni.
Skilaboð frá forstjóra
Í 100 ár hafa mannauður og góðir stjórnarhættir verið lykillinn að farsælum rekstri PwC á Íslandi. Á seinni árum höfum við ennfremur lagt vaxandi áherslu á sjálfbærnimál og þátttöku í samfélaginu í takt við sívaxandi þarfir og væntingar í samfélaginu til ábyrgs fyrirtækjarekstrar. Eins og sjá má í Sjálfbærniskýrslu PwC 2025 leggur félagið sitt af mörkum með m.a. sjálfboðaliðastarfi, styrkjum og gróðursetningu.
Sjálfbærnimál hafa undanfarin ár fengið vaxandi vægi í rekstri fyrirtækja um heim allan en á síðasta ári hefur orðið vart við ákveðið bakslag í þeim efnum. Af hálfu Evrópusambandsins voru boðaðar breytingar á sjálfbærnitilskipunum og flokkunarreglugerð. Innleiðing þeirra hér á landi hefur því lent í ákveðinni biðstöðu.
PwC Global vaktar bæði viðhorf stjórnenda gagnvart sjálfbærni og loftslagsmálum en einnig hver staðan er á innleiðingu sjálfbærniupplýsinga. Sú vöktun sýnir glögglega að sjálfbærni- og loftslagsmál eru enn brýnt viðfangsefni í hugum stjórnenda og fjárfesta um heim allan. PwC á Íslandi hefur lagt sitt af mörkum með útgáfu Sjálfbærnivísis PwC, þar sem sjálfbærnistarf 50 stærstu fyrirtækja landsins er greint. Þar má sjá að íslensk fyrirtæki eru almennt á réttri leið – en þróunin gengur þó hægt og betur má ef duga skal til þess að Ísland geti staðið undir skuldbindingum sínum um samdrátt í losun.
Það er von PwC að fyrirhuguð einföldun regluverks muni auka svigrúm fyrirtækja til að innleiða sjálfbærar lausnir og stuðla að auknu samkeppnishæfni með þeim hætti. PwC á Íslandi er reiðubúið að leggja sitt af mörkum í þeirri vegferð.
Friðgeir Sigurðsson, Forstjóri PwC á Íslandi (2025)
Contact us
